"يوميات منى و احمد فى الصحوبيه"

ربنا معاكي ياحبوبه ابقي طمنيني عملتي ايه أصل انا برده مستنيه الامتحان. Sad

وبجد الحلقات كل يوم بتبقي أحلي ربنا يعينك.

ربنا معاك يا حبوبة وتطمنى فى الامتحان وترجعى وتقولى جبت مية فى المية
وبجد الحلقات كل يوم بتشدنا عن اللى قبلة
ميرسى ليكى كتيرررررررررر

مفيش تعب ابدا , انا بس مش كنت متاكدة انى هخلص بدري
و ميرسي ليكو كتييييييييييييييييير

cheers

و اخيرااااااااااااااااااااااااااااااااااا خلصت منها.. عقبال كل اللى لسه مخلصوهاش

يارب ياحبوبه
أصل أنا مش عارفه هاخلصها اذاي أصلا.

ربنا معاكى بقى يا داليا

ياااااارب.

اااااااااامين كلنا نخلصها ان شاء الله امال اللى لسه مبدأش زى يعمل ايه بس ربنا معاكم ياجماعة

الحلقه الرابعه عشر

توقفت منى عن لوم نفسها كلما رأت احمد , او عن التردد في الرد عليه في التليفون, فقد كان لا ينفك يتصل بها لاسباب عجيبة, فمرة يريد رقم شيرين الذي فقده, ومرة يسألها عن موعد عيد ميلاد سارة, ومرة يسأل عنها هي, وكأنها اعتادت مكالمته, وقد اطمأن عقلها تماما ان هذا شيء عادي , وان ملاقاته في الكلية صارت مهمة شبه يومية , فكانت تلاقيه بابتسامة او كلمة او سلام , ولم تعد تهرب وترتبك مثل الاول , وقد تخدر قلبها تماما مقتنعا بان الامر مجرد عادة, وان كانت تقر في باطن نفسها بانها اخيرا وجدت من يسأل عنها ويهتم بها ولو قليلا.

اما احمد فقد كانت خطته تسير على اتم مايرام , فهو لم يعد يلاقي صدودا من منى, الا انه تجنب في هذه المرحلة التحدث تماما عن اي مواضيع شخصية , حتى لا ترتاب فيه, بل صار لا يتصل بها الا بسبب معين , وقد لايطيل بالمكالمة , الا انه كان كل هدفه جعلها تعتاد على وجوده في حياتها, ويحاول قدر الامكان يبدو بمظهر الرجل المشغول بمصلحتها, "وكأنها أخته" , وقد تعمد تكرار بعض الكلمات ك"عيب يا منى دا انتي اختى" ,او"احنا اصحاب يابنتي فيه ايه" وكان ذلك كلما اراد ان يقدم لها خدمة , ومع العلم ان الشباب لا يقدمون خدمات لاخواتهم.

ذات يوم رأي مؤمن أخو منى الكبير رقم هاتف احمد على تليفونها فسألها ,وقد اعتاد ان يقلب في هاتفها

مؤمن: مين ايمو دي؟
ارتبكت منى قليلا, ثم قالت
منى: دي ايمان واحدة معايا في الكلية.
ثم اخذت موبايلها من يده ودخلت غرفتها واغلقت عليها.
منى* ايه الي انتي عملتيه دا؟, كذبتي ليه؟, مكانش فيه داعي تكذبي
وتقوليله ليه؟ , وهو يسألك ليه اصلا؟, هو كل شوية تفتيش؟ , انتي المفروض يكون ليكي خصوصيتك, انتي بنت ودي حرية شخصية
بس انا عمري مكذبت عليه , ومكانش له لازم اصلا اكذب , مفيش حاجة
انتي بتستهبلي , عايزة تقوليله دا صاحبي الاكبر منى , ولما يفتح اللوج ويلاقيه هاريكي مكالمات
بس عادي منا كل مايسألني على نمرة ولد على موبايلي بقوله
دا لما يكون قدك , او اصحابك من المدرسة , بس مش احمد
طب ولما يشك؟,ولا يسأل شيرين؟, اعمل ايه انا ساعتها بقي؟
ماهو الي هيخليه يشك ,غباوتك دي, وانتي ايه الي يخليكي تقولي لحد؟, مفيش حاجة عشان تحكي, انتي عايزة تشككيهم فيكي ع الفاضي, انتي بتدوري ع المشاكل وخلاص؟,ولا تقولي لحد خالص , لا شيرين ولا سارة ولا مخلوق يعرف , انتي كبرتي , ومن حقك تحتفظي باسرارك لنفسك, خليكي كده مصحصحة, محدش هيخاف عليكي الا انتي
يعني , مقولش لحد خالص؟؟؟
خاااالص ,خالللللص

********************
احمد: الو منى؟ ايه الاخبار.
منى : الحمد لله .
احمد: صوتك عامل كده ليه؟,مالك؟, انتي عيانة؟؟
منى : اه , من امبارح وانا عندي برد,اخنفيت صح؟؟
منى*حد يقول لولد اخنفيت؟؟ مش تمسكي لسانك؟
احمد: لا دا انتي شكلك تعبانه خالص ,بتاخدي دوا؟.
منى: اه معتز جابلي دوا وهو راجع من صلاة الجمعة .
أحمد*هو النهاردة الجمعة ؟, ودا مين معتز دا كمان؟
احمد: معتز ؟ , دا اخوكي الكبير؟.
منى: لا , مؤمن الكبير , معتز اكبرمنى بتلات سنين.
احمد: دا الي في صيدلة المنيا؟
منى: اه .
أحمد*اكيد اصغر منى
احمد: هو نازل كام يوم؟
منى: هيقعدله اسبوع عشان العيد الكبير ويرجع تاني.
عطست منى اثناء الحديث ثلاث مرات على التوالي , ولما اعادت السماعة على اذنها سمعت احمد منخرطا في الضحك فقالت.
منى: انت بتتريأ عليا؟؟
احمد: لا , يرحمكم الله , بس حاسبي تعديني, انا هقفل عشان شكلك كدة مش قادرة تتكلمي .
منى*ليه كده , خليك تسليني شوية , دانا زهقانه من الصبح مقمتش من على السرير
منى: ايه ده ,خايف تتعدي؟
احمد: لا , انتي اي حاجة منك حلوة , حتى العيا , بس انتي شكلك تعبانة بجد .
منى: ماشي ياسيدي, روح قبل ما اعطس تاني.
احمد: سلامتك يا قمر ياريتني كنت انا.
منى* ...............
منى: باي باي.
احمد: باي يا جميل.
بعد ان اغلق احمد التليفون قرر الارتقاء بخطته للمرحلة الثالثة , فانتظر حوالي نصف ساعة ثم ارسل لها رسالة على التليفون
"سلامتك يا موني , لو اقدر كنت اكون انا مكانك كنت اخدت منك العيا , شدي حيلك , عشان نرجع نشوفك تاني"

تلقت منى الرسالة قبل نومها, فابتسمت وشعرت بالسعادة وغالبها النعاس , ونامت تحلم باحمد.
اما احمد , فشعر باقتراب نجاح خطته ,وان صبره لم يكن بلا جدوي , وقريبا جدا ستقع منى في يده , وساعتها يرتاح

^
^
^
^
^
^
^
^

الحلقه الخامسه عشر

صبر احمد , وكان لصبره هدف, بعد هذه الرسالة كان يجب ان يتركها قليلا تتفاعل, وبعد ان عودها على مكالمته كل يوم , بدأ بشغل نفسه باشياء اخرى , حتى يمتنع عن الاتصال بها, وكأن دوره انتهى كمهاجم, وبدأ برمي الكرة بملعبها هى, سينتظر الايام المتبقية حتى العيد , ولن يتكلم ثانية , ليرى ماذا ستفعل هي.

اما منى فمر عليها اليوم بسنة, سنة كاملة بشهورها واسابيعها , انتظرت في كل ثانية اتصال احمد , لاي سبب ولكل سبب, انه لم يتصل منذ مرضها, وها هي تعافت , ولم يطلب ليطمئن عليها؟, الم يقل انه على استعداد لاخذ المرض بدلا عنها, ما الذي حدث؟, لماذا يتجاهلها بهذا الشكل, ومالذي يقصده بهذا الصد؟ , وبسبب مرضها لم تذهب للجامعة, و لم يعد هناك سبب للذهاب فالجميع شبه ممتنع بسبب الايام السابقة للعيد وصيام العشر الاوائل من ذي الحجة, والوقفة اجازة رسمية,وكأن لا يوجد شيء اخر لمنى لتفكر به, صار سكوتها قلق, وكلامها تساؤل, جتى انها منعت نفسها مئات المرات من التحدث عنه امام شيرين او سارة او ميرنا او اي حد, وان كانت تمنت ان يذكره احد حتى ترتاح, اين انت يا احمد؟
*******************

منى* وبعدين يا احمد ؟ , بقالنا كتير قوي متكلمناش , تلات تيام بحالهم
مش تطلبي تسألي عليه انتي, افرضي كان حصل حاجة
لا , لو كان حصل كنت عرفت , انا بكلم البنات كل يوم ومحدش بيجيب سيرة, ومينفعش اطلبه انا لا , عيب
هو ايه دا الي عيب؟,هو انا بقولك اطلبيه قوليله بحبك, انا قلت اطلبي اسألي عليه , عادي يعني انتو اصحاب , مانتي اتصلتي بخالد الاسبوع الي فات لما رجله اتكسرت
طيب دا و رجله اتكسرت, وبعدين احمد وضع تاني, مينفعش اتعامل معاه بعفوية, لحسن يفهمنى غلط
مين دا الي يفهمك غلط؟, على فكرة انتي مش في دماغه اصلا, مش عشان بيكلمك كل يوم يبقي خلاص, واقع فيكي, دا هو الي طبعه كده بيسأل على الناس, وبعدين انتي تطولى اصلا انه يبصلك, دا انتي عبيطه وخيبة, ما البنات حواليه كتير, طلعى من دماغك المواضيع الخايبة دي, وفكري عادي كده, متبقيش قديمة اوي كدة
******************

أحمد* ياتري يا موني عاملة ايه؟, انا في دماغك ولا نسيتي , بقالك تلات ايام , كفايه كدة ولا لسه؟, ياتري ايه الي في دماغك دلوقتى ؟, ابعت الرسالة دلوقتى ولا استنى؟
متبعتش حاجة استني تطلبك هى
وافرض مااتصلتش؟, انا عايز اخلص
قلة صبرك دي الي هتضيعها منك ,يا راجل اتقل
اتقل على ايه؟, دي البنت خام جدا, دا كان كفاية يوم واحد
ولما هى خام وكفاية يوم , ما تصلتش ليه؟, دانت الي خام ,طيب ايه رأيك بقي ان البنت دي اصيع منك انت شخصيا, لانها مسبتاك انت جمب التليفون بدل منتا تسبتها
تصدق عندك حق, طب والله ما معبرها الا يوم الوقفة
ايوه كده خليك راجل , قال خام قال

*****************
انتظر احمد وهو يقاوم نفسه, حتى اليوم الموعود , وانتظر حتى منتصف اليوم ثم ارسل رسالة
" كل عيد وانتي طيبة يا اغلى حاجة في حياتي ويارب تكوني بخير"
أحمد* ..........................؟
*****************

تسمرت منى امام الرسالة طويلا, محاولة الوصول الى فهم منطقى للرسالة, وقد اقشعر بدنها كله من صراحة الكلمات, والتعبير البادي فيهم , وظلت تقرأها مرارا وتكرارا, ماهذا؟؟
منى*دا ايه دا بقى؟؟؟, انا مش فاهمة حاجة, الواد دا بيشتغلني ولا ايه
ويشتغلك ليه ما الكلام واضح اهه قدامك
واضح منين؟, انا مش فاهمة حاجة
ايوه , خليكي غبية كدة لحد ماتضيعي منك الواد
اضيعه منى ازاي, انا اصلا معملتش حاجة, ليكون بعت الرسالة دي غلط ؟, والمفروض تروح لحد تاني؟
ممكن , وممكن تكون جايالك انتي, شوفي هتعملي ايه عشان تتأكدي
وانا مالي , مش هعمل حاجة
لا طبعا هتتصلي بيه النهاردة باليل عادي جدا , قال ايه بتقوليله كل سنة وهو طيب و تعملي مستهبلة ,لو الرسالة مش ليكي هيقولك انا اسف, ولو ليكي هيسألك رأيك فيها
لا طبعا, عمري ما هتصل بيه , ليه ؟, هو انا مجنونة
طيب خلاص خليكي كده هتموتي وتعرفي الحقيقة
*****************

أحمد*لما نشوف ياسي ايمو انت لسه معلم ولا بقيت خيخة ,مستنيكي يا موني ولو للعيد الكبير الجاي

جميلة تسلم ايدك بس مش تطول اكترمن كدة انا ملهوفة على الحلقة الاخيرة

....... شكرا لمرورك الجميل يا آية
بس من ناحية هتطول فمعلش لسه بدرىىىىىىىىىىىىىىىىىىىى

انت كدة بتنزع الثقة مننا بجد واحنا اصلا مش نقصين يعنى بس هقول اية دى الحقيقة مستنين الباقى

أنا اللي هايجنني عاوز منها أيه؟؟؟!!
مجهود جميل ياحبوبه
متشوقين للحلقه الجايه.

هى كام حلقة؟؟؟؟؟؟؟؟؟؟

مش كنت عاوزة اقول عشان مش تزهقو silent

بس هى 106 حلقة

ياااااااه
مسلسل (نور) ولا ايه؟

هههههههههههههههههههههههههههههههههه
هو كان 106؟؟ اصلي مشفتوش

ربنا يدلنا ويديكِ طولة العمر.

لا أظن أكتر بس مقربله.
طيب الحمد لله ان قلتلك يبقوا حلقتين ويارتني قلت تلاته. Laughing

ههههههههههههههههههههههههههههههههههه
اوك يا داليا
ان شاء الله كل م الوقت يسمح هيكون في حلقات اكتر

الحلقه السادسه عشر

منى: الو؟
منى* ايه دا الي بتعمليه دا؟ اقفلي بسرعة
ششششششششششش
احمد: الو , منى؟
أحمد*جووووووون , وجون وجون وجون
منى: ازيك يا احمد؟
منى* ......................
أحمد* و مقبولة منك احمد كمان يا ستى
احمد: الحمد لله, على فكرة كنت هكلمك من شوية , ليكي وحشة والله.
القى اليها احمد الكلمة ذائبة وسط الحديث حتى لا تستطيع التعليق عليها وان ارادت.
منى* ااااه, وبعدين بقي, متخليك واضح
منى: كل سنة وانت طيب.
احمد: وانتي طيبة يا موني, انا بعتلك اس ام اس النهاردة باين ؟ صح؟
منى*انت كمان مش فاكر؟
أحمد*هههههههههههههههههههه
منى: اه
منى* ايوه , اتكلم في الموضوع بقي
أحمد*خليكي على نار
احمد: انتي عارفة ان دي اول مرة تتصلي بيا من ساعة معرفتك.
منى: يلا اهو عيد بقى , وزكاة العيد, ههههههه.
احمد: ...........
منى: انت ساكت ليه؟
احمد: كنت بسمع ضحكتك.
ارتبكت منى وتمنت لو لم تتصل , ولم تدر بم تجبه.
منى: ................
احمد:انا ضايقتك؟
أحمد*طبعا مش طايجة خلجاتك م الفرحة
منى: لا ابدا عادي.
منى* عادي ايه بس انتي كمان
احمد: انتي بقيتي احسن دلوقتى؟؟,اصل اخر مرة كلمتك كان عندك سارس.
منى: منا خفيت , خدت حقنة ياباني.
احمد : طيب الحمد لله, رايحة فين في العيد؟
منى: مش رايحة , كنا هنسافر السنة دي بس بابا مش فاضي, فهنقضيه هنا.
احمد: انا مسافر مع جماعة اصحابي , هنهيص شوية , ماتيجي معانا.
منى: اه حاضر , هلبس هدومي ونازله اهه.
احمد: طيب انا مستنيكي تحت البيت, اوعى تتأخري.
منى: مسافة الاسانسير.
منى* المكالمة قلبت استظراف ليه؟ , انت مبتتكلمش عن الرسالة ليه؟
أحمد* طبعا هتموتي وتسألي عن الرسالة ,بس بعينك
احمد: ههههههههههههههه, والله انا اتبسطت اوي انك كلمتيني.
منى*طب ما تتكش اوي على كلمتيني
أحمد*لما نشوف هتعمليها تاني ولا ايه؟
منى: دا اقل حاجة ممكن اعملها لعامة الشعب.
احمد: لا انا بتكلم بجد, وكل سنة وانتي طيبة , بجد.
منى: بجد بجد يعني, طيب انا مش طيبة.
احمد: لا انا عارف انك طيبة.
أحمد*طيبة وعبيطة كمان
احمد: طيب يا ستي ربنا يديكي على قد نيتك , بس ابقي كرريها .
منى : اه , ان شاء الله.
منى*في المشمش
احمد : ماشي يا موني , عايزة حاجة؟
منى*ياما نفسي تبطل موني دي, هو انا بقولك ايمو؟
منى: لا ,شكرا, مع السلامة.
احمد: باي باي.
*******************

أحمد* قشطة كده اوي ياواد يايمو خليك تقلان وهي الي هتعمل كل حاجة , من النهاردة انت حتبطل تشتغل , وتسكت خالص, سيب المواضيع تمشي براحتها
بس مش حرام؟ دي البنت لذيذة والله , وانا فعلا اتبسطت لما كلمتني
لا مش حرام , ولما هي عجباك عايز تفضل معجب بيها من بعيد لبعيد, لا, لو هى زي ما بتقول صحيح, هتسيبها لغيرك يعمل بيها ايه, سبتها برضه وخليها تحبك
عندك حق , انا البنت دي بجد داخلة دماغى وربنا يسترالمرة دي
المهم دلوقتى, ركز انت على خطتك وسيبك بقي, تحبها متحبهاش دي حاجة تانية , بعد ما تكون خلصت تسبيت
منا خلصت التسبيت من زمان , هى دلوقتى يا اما هتحبني , يا اما هتحبني
احبك وانت مصمم
*******************

منى* وايه يعني لما تحسي انك متعلقة بيه مالك مكبرة الموضوع اوي كده ؟, هو انتي اول ولا اخر واحدة
انا مش مكبرة حاجة, الموضوع كبير لوحده , يعني ايه اتعلق بيه , انا مش قده
ومش قده ليه ان شاء الله , صغيرة؟؟, منتى عدى عليكي ناس برضو و حاولو يكلموكي , اشمعنى دا الي وقفتى قدامه وتنحتى
ماهو عشان كده انا خايفه , انا خايفة لا احبه
طب ماتحبيه , هو عيب ولا حرام , مادام مش هتعملى حاجة غلط
هى المشكلة دلوقتى في غلط ولا صح؟, المشكلة اني متعلقة بيه, وهو مش واضح , دا واحد مرة يقولي كلمة حلوة وعشرة لأ
وهو انتي مدياه فرصة , دانتي بتردي عليه بالقطارة
لااااا , الموضوع دا ميتسكتش عليه, انا محتاجة حد يفكر معايا, انا مش قادر اكتم اكتر من كده
لا لا لا , اوعى , داري على شمعتك تقيد وبعدين انا بفكر معاكي
لا , انا هكلم سارة , انا محتاجة حد ينصحنى

^
^
^
^
^
^
^
^

الحلقه السابعة عشر

اتصلت منى بسارة وطلبت الذهاب لبيتها, وبالفعل توجهت اليها , وارتها الرسالة واخبرتها بكل مكالمة اتصل فيها , وكل شيء فعله معها منذ عرفته.
صمتت سارة تستمع بصبر حتى انتهت منى.

سارة: مممم, افهم من كدة ,انو بيرسم عليكي ؟
منى: مش كدة؟ , صح؟,والله انا بقول كده.
سارة :بس من الي فهمته منك ,انا مش قلقانه من احمد ....... انا قلقانة عليكي انتي.
نظرت منى لسارة واغرورقت عيناها بالدموع ,وحاولت الكلام ,ولم تستطع.
سارة: انا زعلانه منك , انك مقلتليش الكلام دا من بدري, مش عارفة كنتى مستنية ترتبطو ,عشان تقوليلي, بس انا فرحانة انك لما اخترتي تكلمي حد اخترتيني.
منى: ملقتش حد ينصحنى الا انتي.
سارة : وانا هنصحك , اسمعي يا ستي , انتي بتحبيه؟
منى: لا طبعا , انتي بتقولي ايه , انا بس مشدودة له اوي.
سارة : جميل جدا, مادام مفيش حب تبقي ملحوقة, انتي تعملى مستعبطة زي مانتي, وتحاولى تخفى من احمد دا شوية, تقللي كلام , ومتديلوش اهتمام اكتر من اللازم , تمام.
منى: ......................
سارة: قولي تمام.
تمتمت منى.
منى: تمام.
سارة: وانا بقي مش عايزاكي تفكري في الواد دا لحظة, نلحق كدة قبل ما تقعى فيه, تعالي على نفسك , لو فكرتي فيه,قولي اعوذ بالله من الشيطان الرجيم, اشغلى نفسك جدا جدا جدا, لدرجة انك متسبيش فرصة انك تفكري فيه ثانية, ولو جه على بالك قولى انا حمارة انا حمارة لغاية ما تزهقي ,تمام؟
منى* ما الي ايده في المية مش زي الي ايده في النار, انا برضه الي حمارة؟
سارة : ماتردي.
منى: تمام تمام , ماشي.
سارة : مالك مبلمة ليه؟
منى: هو مفيش حل تاني غير اني اتجنبه؟
سارة: اه , انك تحبيه, تختاري ايه؟
منى: ومالك كده بتقولي تحبيه كأنك مش طايقاه.
سارة :لان تحبيه يعني توافقي تكلميه , وتكلميه يعني توافقي تقابليه , وتقابليه يعني مش هنخلص , وخدي عندك بقي خناقات وتستخبي من اهلك و تكدبى عليهم ومتوافقيش على عرسان و.......
منى: ايه ايه , بالراحة عليا ,مالك انا بقولك انا مشدودة له اتفتحتى زي البلدوزر.
سارة: انا بفهمك يا حبيبتي , عشان انتي خام والمصيبة انه باين عليكي انك خام , فالناس بتستعبطتك.
منى: وحضرتك بقي الي مش خام , مش شايفاكي يعني ماشية كل يوم مع ولد.
سارة: مش معنى انك مجربتيش حاجة في دنيتك , تبقي عايشة كده مش فاهمة حاجة .
منى: الله يكرمك.
سارة : وبعدين انا ياما شفت , انتي ناسية ان اخواتي كلهم بنات.
منى: بس انتي كدة اتعقدتي.
سارة: بيتهيألك , انا كده احسن من ناس كتير , يعني انا لو كنت حبيت , كنت بقيت فرحانه كدة دلوقتى, انا كان زماني انا الي بشكيلك , وبعدين مفيش حاجة اسمها حب,الحاجات الي بتحصل دلوقتى دي مش حب ممكن عادى يبقى عندك خبره من غير ما تجربى.
منى: يا سلام يا ختى؟
منى*انا جيت لمجنونة تنصحنى
منى: بس مسيرك تحبي.
سارة: مش شرط.
منى: امال هتتجوزي ازاي يا فالحة؟
سارة:وهو جواز الصالونات اتعمل لايه يا فالحة انتي؟
منى: من غير حب؟؟؟
سارة: الحب دا لواحدة مراهقة زيك , انا ايه الي يخليني احب واحد وفي الاخر متجوزوش؟,وبعدين الحب بييجي بعد الجواز,انا ايه الي يخليني اجيب واحد لاهو ابويا ولا اخويا يقولي انتي رايحة وجاية منين,لا والبسي دا ومتلبسيش دا, ومتتأخريش عن الساعة كذا .
منى: لااااااا , دانتي متعقدة بجد.
سارة : سيبك منى انا , خلينا في خيبتك.
منى: خيبتي انا برضة دانا جيتلك يا عبد المعين تعيني لقيتك ..............
سارة: والله انا نصحتك , انا مشفتش حد حب وطال والي كنت بقول عليها عاقلة جاية تقع لي في مصيبة , مش تنقي؟
منى: على فكرة احمد ظريف جدا وخدوم , وولد محترم اوي بس انتي تعرفيه.
سارة: كفاية انتي تعرفيه, الموضوع لا بالظرف و لا بالخدوم وبعدين اول ما تشوفي ولد تسألي نفسك تلات اسئله .
منى: ايه؟
سارة: بيدخن؟؟
منى*اوباااا
منى: ........
سارة :بيصلي؟؟
منى: .......
م*تصدقي معرفش؟؟؟
ساره: بيعامل اخته و امه ازاى؟
منى: ........
منى* انا اصلا مش عارفه عنده اخوات ولا لأ
سارة:بعد كدة تشوفي ظريف ولا لذيذ ولا دمه تقيل.
منى: طيب ياستي انا هسمع كلامك وامري لله , خلينا ورا سارة لحد ما تودينا في داهية.
سارة : الداهية الي انتي رايحالها اسمها ايمو

يسلمولنا ها الأيادى الى كتبت.

.......... شكرا كتير لمرورك الجميل cheers

(بس انا البنت ساره دي عجباني اوي).
تسلمي ياحبوبه بجد.
ربنا يعينك.

على فكرة سارة دي عجبانى اوى انا كمان , منى دي مش مقدرة النعمة اللى ف ايدها
, و هتكون هي الكسبانة في الآخر بطريقة تفكيرها الجامدة دى

.................. شكرا لمرورك الجميل يا داليا

أيوه أكيد هي اللي هاتكسب في الآخر
بنت جدعه بتفكرني بنفسي
ولو اني مبحبش أتكلم عن نفسي يعني ههههههه

» يوميات انا فاشل متجدده دوما ...........